अन्तर्मन हाम्रो एक थरीको गाग्रो

अनेक भाव रसायनले भरिएको

छचल्किन्छ बेलाबखत अनायास नै

बोल्ने सुन्ने फुर्सद कसलाई मिठो राम्रो

कठै ! निन्दा रसमा लठ्ठ समाज हाम्रो ।

विष ओकल्नेहरु ठूला क्रान्तिकारी रे

गरी खानेहरू सबै चोरडाँका हुन् क्यारे

अरूको हुर्मत लिँदै हिँड्ने अनाहक मै

काम केही नगर्ने भयो सबैको प्यारो

कठै ! निन्दा रसमा लठ्ठ समाज हाम्रो ।

आफूले के गरे गरिन लेखाजोखा नराख्ने

कुन बाटो हिँडे, के बिराए हेक्का नराख्ने

कनपारो तताउने शब्दले पायो वाह वाह

अरूलाई लडाउँदै हिड्ने मान्छे भएछ हिरो

कठै ! निन्दा रसमा लठ्ठ समाज हाम्रो ।

छिमेकी लड्यो रे, हिँड्दाहिँड्दै एक दिन

जाँड पचेन, भीडमा करायो कुनै एकले

हो, हो, सही कुरो, बर्सिन थाले शब्दबाण

क्षतविक्षत कानमा दोषी ढुङ्गो सुसायो

कठै ! निन्दा रसमा लठ्ठ समाज तिम्रो ।