चरित्रनिर्माण

छन्दः वियोगिनी

मनमोहक भावना गरा
दिलशृङ्गार बनून् नहुन् छुरा
मलनिर्मल हुन् विचित्रका
नवनिर्माण गरौँ चरित्रको।
१

कमलाकृतिझैँ बनून् प्रिय
नबनून् कण्टक हुन् सुधामय
छलशून्य बनोस् विवेक यो
नव निर्माण गरौँ चरित्रको।
२

वटवृक्ष समान हौँ सदा
सबको शीतलता र सौख्यदा
दिन सक्ने क्षमता उचालियोस्
नव निर्माण गरौँ चरित्रको।
३

बल पौरखले अजेय हौँ
सुखदा चिन्तन हुन् र प्राण हौँ
जनका मनमा विचारको
नव निर्माण गरौँ चरित्रको।
४

सुखको वहमा नहौँ वृथा
सबका दूर गरौँ न आपदा
बनिओैँ मणितुल्य देशको
नवनिर्माण गरौँ चरित्रको।
५

शरदेन्दु समान निर्मल
नलिनी पुष्पसमान कोमल
शिरसोच बलोस् विवेकको
नवनिर्माण गरौँ चरित्रको।
६

रसमा झुमिऊन् सखाहरू
पुतली भृङ्ग र माहुरीहरू
कुसुमाकरझैँ विचित्रको
नवनिर्माण गरौँ चरित्रको।
७

श्रमकौशलले झुकून् जन
परचक्री सबको जितौँ मन
अघि हौँ श्रमले समाजको
नव निर्माण गरौँ चरित्रको।
८

हितकारक हुन् कुरा सब
हृदयाकाश बनोस् सुधा अब
जनका मनमा पसे निको
नवनिर्माण गरौँ चरित्रको।
९

शुभ निर्मल शब्द आँकुरा
भन जिह्वा रसिला सधैँ भला
सब कष्ट हटून् सुवाक्यले
नवनिर्माण गरौँ चरित्रको।
१०

हरिप्रसाद रिमाल

मोती फल्ने डाँडा

छन्द- वियोगिनी
छन्द- शालिनी

डाँडाकाँडा छन् यहाँ भीर पाखा
अग्ला होँचा छन् सबै मस्त शाखा
सेता नाङ्गा दृश्य औधी छ उम्दा
चारै किल्लादेख्न पाइन्छ घुम्दा
१

सन्ध्यामा झन् सूर्यले स्पर्श गर्दा
मोती दाना बुर्र सेताम्य पर्दा
औधी राम्रो देखिने झन् सुनौलो
चौतर्फी देखिन्छ उत्कृष्ट नौलो
२

घुम्टो ओढी ध्यानमा छन् तपस्वी
जस्तै सारा देखिने झन् यशस्वी
गाह्रो उक्ली जान ज्यादै छ माथि
पल्टी हेर्दा शान्त सौन्दर्य साथी
३

घाँसे पाखासम्म मैदान फाँट
चौंरी च्याङ्ग्रा चर्दछन् एकसाथ
डाँफे उड्दा स्वर्गको भान हुन्छ
यस्तो धर्ती पुन्यले प्राप्त हुन्छ
४

अर्को यस्तो मिल्छ के स्वर्ग उम्दा
इच्छाले देखिन्छ आएर घुम्दा
नेपालीको मान सम्मान पाई
मिल्ला झन् सन्तुष्टि आए रमाई
५

रसज्ञ छहरा
कावासोची -३ नवलपुर, नेपाल

सिकाइ…शालिनी

पढ्दा लेख्दा शारदा साथ पाऊँ
यो धर्तीमा ज्ञान गङ्गा बहाऊँ
नौला नौला भावना दिव्य घोलूँ
मेरा सारा चित्तको द्वार खोलूँ ।
१

बास्ना छर्ने बाबरी बाग बारूँ
बानी मेरो स्वच्छ पारूँ सपारूँ
सिक्दै जाँदा सत्य मात्रै म बोलूँ
मेरा सारा चित्तको द्वार खोलूँ ।
२

खोला जस्तै जिन्दगी हो सबैको
राम्रो मात्रै देख्न पाऊँ सबैको
भित्री मैलो दूर फालूँ पखालूँ
मेरा सारा चित्तको द्वार खोलूँ ।
३

हाँस्दै झुल्छन् फूलले कन्दरामा
जन्मै जान्ने हुन्न कोही धरामा
सिक्दै बोलूँ गोप्य मैले नखोलूँ
मेरा सारा चित्तको द्वार खोलूँ ।
४

पानीलेझैँ मार्ग आफैँ बनाई
जानूँ मैले ज्ञान मेरो कमाइ
आफ्ना मान्छे वा पराई पगालूँ
मेरा सारा चित्तको द्वार खोलूँ ।
५
शान्ति सिग्देल

हाम्रा सारा चित्तका द्वार खोलौँ

कालो मैलो तुच्छ जालो निकालौँ
जालो फाली दिव्य आभा अँगालौँ
हामी प्रातः वन्दना शब्द बोलौँ
हाम्रा सारा चित्तका द्वार खोलौँ।
१

साना साना भाइ बैनी सिकाऊँ
सिक्ने इच्छा भित्रबाटै जगाऊँ
राम्रो बोली प्रेमका भाव घोलौँ
हाम्रा सारा चित्तका द्वार खोलौँ ।
२

हामीलाई चाहिने शुभ्र भाव
शिक्षाले नै छर्छ राम्रो प्रभाव
राम्रो सोची कर्मले अर्थ मोलौँ
हाम्रा सारा चित्तका द्वार खोलौँ ।
३

हाम्रो धर्ती पारिएको पछाडि
दौडी जाऊँ पुग्न पर्ने अगाडि
धर्तीलाई अग्र पार्ने कबोलौँ
हाम्रा सारा चित्तका द्वार खोलौँ ।
४