यता रमिता
उता रमिता
चारैतिर रमिता
र, म मूकदर्शक रमिते

किन रमिता
के को रमिता
कसरी रमिता
र, म अर्धबुझक्क्डी रमिते

पूर्वतिर रमिता
पश्चिमतिर रमिता
उत्तर-दक्षिण पनि रमिता
र, म दिशाविहीन रमिते

खोलामा रमिता
वन-जङ्गलमा रमिता
सिमानामा रमिता
र, म नालायक रमिते

झुपडीमा रमिता
महलमा रमिता
दरबारमा रमिता
र, म दिवास्वपनमा मस्त रमिते

पेटमा रमिता
आङमा रमिता
बासमा रमिता
र, म बेसहारा रमिते

गाउँमा रमिता
शहरमा रमिता
देशमा रमिता
र, म नतमस्तक रमिते

हिमालमा रमिता
पहाडमा रमिता
तराईमा रमिता
र, म बेहोसी रमिते

सडकमा रमिता
सदनमा रमिता
सरकारमा रमिता
र, म निर्लज्ज रमिते

आकाशमा रमिता
जमिनमा रमिता
पातालमा रमिता
र, म बेसहारा रमिते

साथी-सङ्गीमा रमिता
आफन्तमा रमिता
परिवारमा रमिता
र, म सदाबहार रमिते

जिन्दगी रमिता
रमिता जिन्दगी
उता उनी रमिते
र, यता रमिते म ।