उनको भिडियोमा हिँडाईको मादकता
मात्र कि नैनालाई थाहा छ
कि त नरेन्द्रलाई

आफ्नै मादकतामा लठ्ठ पर्ने
नैना मनोचिकित्साबाट ग्रसित छिन्
भने
नरेन्द्र, नैनाबाट

नैनाको मादले नरेन्द्र लठ्ठ छ
नैना आफ्नै मादले मत्ता अनुरागी ढोई जस्तै

झ्यालमा बसेर ऐना हेर्दा
नैनाले नरेन्द्रलाई देख्छिन्
आँखा बन्द गर्दा नरेन्द्रले नैनालाई !

उनी गाउँकी नैना नानी हुन्
तर
नरेन्द्रकी अलि बढी
अलि नजिक
अलि खास र श्वास

नरेन्द्र नैनालाई हेर्दा काँप्छ
नैना नरेन्द्रलाई हेर्दा
दुवैलाई दुवै मन पर्छ
दुवैलाई दुवै चाहिन्छ
तर
फेसबुकबाहेक अन्त भेट्दैनन्

नैनाले तस्बिर राख्छिन्
नरेन्द्र लभ रियाक्ट गर्छ
नरेन्द्र मुक्तक लेख्छ तस्बिर हेरी
नैना लाइक् ठोक्छिन्

वैंशालु भाउजूका
नशालु आँखाको
एकोहोरो हेराईले
नरेन्द्रको मुटुमा खिल गढेको छ
भद्र नरेन्द्रसँगको
अभद्र कल्पनामा
नैनाको दिल गढेको छ

अफसोच
यत्तिमा सीमित छ दुवैको भर्चुअल दैनिकी
नैना र नरेन्द्र वास्तविक प्रेम गरिरहन्छन्
अवास्तविक, कृत्रिम आधुनिक दुनियाँमा !