कसको सवारी होला आज, जाम छ अर्कै खालको
अस्पताल पुग्ने मेरो, काम छ अर्कै खालको ।

बल्ल पुगेँ अस्पतालको छेउ, केही अनौठो लाग्यो
हंस उडेर होला आँसुको, लाम छ अर्कै खालको ।

बाबु बितेको खबर छोराले, बल्ल थाहा पाउन
धागोले बेरेको त्यो हेर, खाम छ अर्कै खालको ।

बिस्तारै अघि बढ्यो मुर्दा, बाटोमा केही छर्दै
छरिएको त्यो अन्न अनि, दाम छ अर्कै खालको ।

हिजोसम्म घर उज्यालो थियो, उनलाई देख्दा
आजको यो माहोल अनि, साम छ अर्कै खालको ।

सक्दा सबैलाई सहयोग अनि, भरोसा दिन्थे उनी
त्यसैले त चारैतिर, नाम छ अर्कै खालको ।