न त रानीपोखरी न त ताजमहल बनाउन सक्छु,
सक्छु त केवल तिम्रै मन हलचल बनाउन सक्छु ।

एकपटक मलाई एउटा अवसर दिएर त हेर्नुहोस्,
म जस्तो-सुकै खराबलाई नि असल बनाउन सक्छु ।

असफल अनि नाजुक मेरो आफ्नै जिन्दगीलाई,
म कठोर सङ्घर्ष गरेर नि सफल बनाउन सक्छु ।

आऊ तिमी, तिम्रो संसार भुलेर मेरो संसारमा बस,
तिम्रो संसार तिमीले सोचेभन्दा नि शीतल बनाउन सक्छु ।

महल बनाउन सकिएन, सम्पत्ति कमाउन सकिएन,
अरू केही नसके पनि दुई-चार थान गजल बनाउन सक्छु ।