ओ! नव विजेताहरू हो,
याद राख,
समय बलवान् छ।
छिनभरमा
अमिर भिखारी भएका छन्;
भिखारी अमिर भएका छन्।
शक्तिशालीहरू शक्तिहीन भएका छन्;
शक्तिहीनहरू शक्तिशाली भएका छन्।

इतिहास साक्षी छ,
खराब आचरण
र
दुष्ट सल्लाहकारहरूकै कारण
कसैले हस्तिनापुर गुमाएका छन्
सदासदाको लागि।
कोही
हितकारी सारथी
र
कर्तव्यनिष्ठ इमानदारीताकै कारण
चप्परमुनिबाट जुरुक्क उठेर
गुमाएको हस्तिनापुरमा राज गरेका छन्।

ओ! नव विजेताहरू हो,
बुझ!
यो पनि बुझ!
नरिवललाई हेर्न होइन,
खान जान्नु पर्छ।