बिहानीमा हिमाल देखेँ तराई र पहाड देखेँ
दिल खोलेर मनैभरि मेरो देश नेपाल लेखेँ ।

धेरै भाषा संस्कृति छन् अनेक रीतिरिवाज छन्
विविधमा एकताको माला उनिबसेका छन् ।
सखिया र कौडा नाचेँ साकेला र डेउडा नाचेँ
दिल खोलेर मनैभरि मेरो देश नेपाल लेखेँ ।

प्रकृतिको उपहार हो अनुपम भूमि मेरो
चौरी चर्ने बाघ डुल्ने अदभूत ठाउँ मेरो ।
हात्ती देखेँ गैँडा देखेँ डाफे,मुनाल, मैना देखेँ
दिल खोलेर मनैभरि मेरो देश नेपाल लेखेँ ।

देवभूमि पवित्र यो हजारौं छन् तीर्थ जहाँ
ऋषि, देउता, यक्ष, किन्नर, क्रीडा गर्छन् जहाँ ।
परशुराम, राम सम्झे, बुद्ध, सीता, जनक सम्झेँ
दिल खोलेर मनैभरि मेरो देश नेपाल लेखेँ ।

सगरमाथा शिरको ताज, प्रकृतिको धनी
मेचीकाली जुटेका छन् एकै मन बनी ।
गण्डकी र कोशी देखेँ कर्णाली र काली देखेँ
दिल खोलेर मनैभरि मेरो देश नेपाल लेखेँ ।

परशुराम १२ उनरुवा, डडेल्धुरा