आमा आमा भनी यहाँ रुँदैछु म विदेशमा
बालुवा र घामले घायल हुँदैछु म विदेशमा

बिहानीले पहिलो प्रेम छर्छ मेरै धर्तीमाथि
माटो छुँदा बालु बिझ्छ दुख्दैछु म विदेशमा

आफ्ना छैनन् वरपर देखिँदैनन् हिउँ हिमाल
छैनन् बग्ने नदी आफैँ बग्दैछु म विदेशमा

चौरी, भेडा, बाख्रा, च्याङ्ग्रा सम्झन्छु म साथीसङ्गी
समातेर उँटको लगाम हिन्दैछु म विदेशमा

सुनका बाला तराईमा हिमालमा जलधारा
पापी प्यास तातो विष पिउँदैछु म विदेशमा

रगत झर्छ थोपा थोपा आँसु बनी बनी
चल्दैछ कि छैन छाती छुँदैछु म विदेशमा ।