२०७७ सालमा, साहित्यपोस्टको संयोजन तथा क्रान्तिकारी नेतृ योगमायाका अध्येता उत्तमप्रसाद पन्तको सौजन्यमा स्थापित “साहित्यपोस्ट उत्तम कृति पुरस्कार– २०७८”का लागि ११ पुस्तकहरूको छनौट भइसइसकेको छ । यसै सन्दर्भमा सर्वोत्कृष्ट एक कृतिको घोषणा गर्नुअघि उत्कृष्ट एघार कृतिका स्रष्टाहरूसँग पुरस्कारकै पेरिफेरिमा रहेर संवाद गरिएको छ । यस संवादको मुख्य उदेश्य भनेको “साहित्यपोस्ट उत्तम कृति पुरस्कार”लाई लिएर उहाँहरूको विचार जान्नु र कृतिको बारेमा पाठकलाई लेखकबाटै थाहा दिनु हो ।

यहाँ उत्कृष्ट एघारमा छनोट भएको अन्तर्वार्ता सँगालो ‘प्रश्न‘का स्रष्टा उदय अधिकारीसँगको संवाद प्रस्तुत गरिएको छ ।

तपाईँको पहिलो कृति “साहित्यपोस्ट उत्तम कृति पुरस्कार”का लागि उत्कृष्ट पुस्तकको सूचीमा पर्न सफल पर्यो । कस्तो अनुभूति गरिरहनुभएको छ ?

गौरवको महसुस भैरहेको छ ।

“साहित्यपोस्ट उत्तम कृति पुरस्कार”का लागि ११ कृति छनोट भएका छन् । अर्थात् तपाईँका प्रतिस्पर्धीका रुपमा बलिया कृतिहरु छन् । तपाईँले पुरस्कार जित्नु वा नजित्नुले तपाईँको साहित्यिक यात्रामा के अर्थ राख्छ ?

प्रतिस्पर्धीका रूपमा उभिनु नै एक प्रकारको जित हो । यदि पुरस्कार जितियो भनेँ अगाडिको बाटो अलि बढी उत्साहले भरिने छ ।

“प्रश्न” अन्तर्वार्ताहरुको सँगालो हो, के कारणले अन्तर्वार्ताहरुलाई पुस्तकाकार दिनुपर्ने भयो ?

यो नेपाली साहित्यमा लेखेर आफ्नो इतिहास बनाइसक्नुभएका छ जना स्रस्टाहरसँगको सार्थक संवाद र कता कता यो युनानमा सोक्रेटसको पालामा हुने डायलग र जनकपुरमा यक्षवल्लभ र गार्गीहरूको बीचमा हुने संवादको नजिक छ । यसमा ती स्रस्टाहरूमाथि मेरो अनुभूती पनि भएकोले या अन्तरवार्ता संग्रहभन्दा बढि केही हो । मलाई एक समयको साहित्यिक कथा भन्नु थियो र केही जिज्ञासाहरू मेटाउनु थियो । त्यो काम मेलै गरेँ ।

मैलिक कृति नल्याएर किन अन्तर्वार्ता सँगालो ल्याउनु भयो ?

अन्तर्वार्ताको सँगालोसँगै यो मौलिक कृति पनि हो । मेरो आत्मपरक निबन्ध जस्ता रचनाहरू र थुप्रै धारणासहित गरिएका लामा प्रश्नहरूले यस कृतिलाई अन्तर्वार्ता सङ्ग्रहका रूपमा मात्र रहन दिएनन् ।

“प्रश्न” पुरस्कार पायो भने आर्थिक राशिले के गर्नु हुन्छ ?

म आफूलाई सँधै एउटा प्रतिवद्ध पाठक बनाउने प्रयासमा छु । यदि मैले पुरस्कार पाएँ भनेँ प्रशस्त किताबहरू किन्ने छु ।

अन्त्यमा, भविष्यको साहित्यिक यात्राका योजनाहरु के के छन् ?

पढ्ने, धेरै प्रश्नहरू सोध्ने र आएका उत्तरहरूलाई कठाघरामा उभ्याएर जाँच्ने ।