१

यो माटो छ र त म बाँचेको छु

यो बाटो छ र त म नाचेको छु

मेरो अस्तित्व भन्नु नै सहअस्तित्व हो-

यो पाटो छ र त म हाँसेको छु ।

२

माटोको पूजारी हों ऊ धर्तीकै पुत्र हो,

जे गाउंछ उसले त्यो धर्तीकै स्तोत्र हो,

माटोमै मितेरी लगाई पुस्तौपुस्ता गुज़ार्यो-

पुस्तान्तर हूँदै सिकेको त्यो जीवनसूत्र हो।

३

पहाडमा पहिरो झर्नुमा पनि,

अतिवृष्टि अनावृष्टि पर्नुमा पनि,

मांछेकै गल्ती छ कि झै लाग़छ अचेल-

प्रकृतिले यो तमाशा गर्नुमा पनि!

४

हेर्दाहेर्दै सेतो हिमाल कालो भयो भने,

च्यातिएको ओजोनको जालो भयो भने,

सम्झनु कि संकटले घेर्न थाल्यो अब-

उल्टोपाल्टो मौसमको पालो भयो भने !

५

मेरै धर्ती, मेरो मात्रै आकाश भन्यो भने,

प्रकृतिको दोहनलाइ बिकास भन्यो भने,

साझा घर हो, सहँदेन प्रकृतिले पनि-

आफ्नो मात्रै समस्याको निकास भन्यो भने !