अनुवादक: सन्तोषकुमार पोखरेल

ईश्त्वान दाबि

ठूलो शहरका सडकहरूमा
हल्ला छ
अनि जिज्ञासु आँखाहरू
अपिरिचितको खोजीमा छन्
जो प्रायः अलप हुने गर्छ
र फेरि देखा पर्दैन
अर्कै पहिरनमा छ शरीर
ऊ अर्को मुलुकको हैन
अर्कै ग्रहको पनि हुनसक्छ
यी सडक र गल्लीहरूमा ।

तर जसै ऊ बस्छ
सानो पार्कको एकमात्र बेन्चमा
केटाकेटीहरू उसलाई घेर्न पुग्छन्
कौतुहलतापूर्वक उसलाई हेर्छन्
उसका लुगा छुन्छन्,
अनि उसका हात र अनुहारमा औंला चलाएर
हाँस्दै टाढा भाग्छन् ।

चाँडै पूरा शहरले चाल पाउँछ
एउटा अपरिचित मान्छे बसेको छ
त्यो सानो पार्कको बेन्चमा

जो पूरै भिन्न छ
भिन्न छन् हाउभाउ अनि
छालाको रंगसमेत भिन्न छ
भिन्न छन् कपडा पनि

उहिलेदेखिको ऊ अपरिचित
उसलाई घुरेर हेर्नु नै उचित
छिट्टै ऊ विस्मृत हुनेछ पख आज
शहरका समस्याहरू माझ

फेरि ऊ उनका मगजमा आउँछ
जब कोही बिरामी पर्छ
जब कोही मारिन्छ
अनि मान्छे ऊसित डराउँछ

किनभने ऊ अरुभन्दा भिन्न छ
भिन्न हुनु भनेको नै गलत हुनु रहेछ
किनभने ऊ अरुजस्तो देखिदैन
आफ्ना छालामा
आफ्ना कपालमा र आँखामा
उसका अरु नै रङ छन्
अनि,
अर्कै पहिरनमा छ शरीर
ऊ अर्को मुलुकको हैन
अर्कै ग्रहको पनि हुनसक्छ
यी सडक र गल्लीहरूमा

अनि,
ऊ यहाँका रैथाने भन्दा पातलो छ
ऊ यहाँका रैथाने भन्दा अग्लो छ
ऊ यहाँका रैथाने भन्दा चौडा
ऊ यहाँका रैथाने भन्दा होचो छ
उसले तिनको भाषा बुझ्दैन
तेसैले ऊ गलत मात्र हुनसक्छ
सबै ऊसित डराउँछन्
अब बच्चाहरू उसलाई जिज्ञासाले हेर्दैनन्
अब डरले हेर्छन्,
वयस्कहरू उसलाई घृणाले हेर्छन्

बडो घृणाका साथ
पुलिसले के बचाउँथ्यो त्यो एक्लो जीवलाई
जो सानो पार्कको बेन्चमा ऐले पनि बसिरहेको छ

ऊ कुनै मान्छे हैन
बरु एउटा अज्ञात गल्ती हो
दुष्ट जीव हो
अब पुलिसले रिसाहाहरूबाट हैन,
बरु उसबाट तिनको प्रतिरक्षा गर्नेछ
यद्यपि ऊ यहाँ केवल पसेको मात्र थियो
शहर बुझ्न,
शहरका बासिन्दाहरूका बारेमा बुझ्न ,
तिनका भाषा बुझ्न ,
रीतिरिवाज बुझ्न ,
तर डरले ऊ भाग्नै पर्यो
डरले आत्तिएको जंगली भीडबाट
x x x
प्रेमबाट प्रायः
विश्वमा घृणा पलाउँदो रहेछ
एउटा भयङ्कर घृणा,
कसलाई थाहा र फेरि यसले
साँचो प्रेमलाई जीवन प्रदान गर्छ कि?

(ईश्त्वान दाबि हंगेरीका बहुभाषिक कवि हुन् । २३ भाषा बुझ्न र केही राम्रै बोल्न सक्ने यी कविले विश्वका १०० भाषाका कविताहरूलाई हंगेरेली भाषामा उल्था गरी कैयन् पुस्तक संग्रह निकालिसकेका छन् ।)