साहित्यपोस्ट
नेपाली भाषा र साहित्यको सम्पूर्ण पत्रिका

१५ वर्ष र ३ उपन्यासपछि दिक्क उपन्यासकार

Chovar Blues Mobile Size
हिलारी मन्टेल

गएको १५ वर्षमा एउटै विषयमा घोत्लिएर तीन उपन्यास बजारमा ल्याइसकेकी दुई बुकर पुरस्कार हात पारेकी हिलारी मन्टेल अब आफू ऐतिहासिक विषयका उपन्यास नलेख्ने निर्णयमा पुगेको र त्यसतर्फ नघचेट्न आफ्ना प्रशंसकहरूलाई आग्रह गरेकी छन् ।

एडिनबर्ग अन्तर्राष्ट्रिय पुस्तक महोत्सवमा गएको साता बोल्दै उनले सो कुरा बताएकी हुन् ।

महोत्सवमा उनलाई अब बेलायती इतिहासको प्रमुख पात्र थोमस क्रमवेलमाथि लेखिएका तीन वटा उपन्यासकै निरन्तरता दिने हो कि भनी प्रश्न सोधेका थिए । त्यसो त यो प्रश्न उनलाई यहाँ मात्र सोधिएको होइन, बुकरमा उनको पछिल्लो उपन्यास ‘द मिरर एन्ड द लाइट’ लामो सूचीमा पर्नेबित्तिकै उनका संसारभरका प्रशंसकहरूले सोधेका थिए ।

‘मेरो जीवनमा यो विषयमा उपन्यास लेख्नुका अतिरिक्त एउटी महिलाको जीवनमा अरू पनि जीवन हुन्छन्,’ उनले भनिन्, ‘म त्यो जीवन बाँच्न चाहन्छु ताकि जीवन बाँच्न त ढिला पो भएछ भनेर पछि पछुताउनु नपरोस् ।’

उनका अघिल्ला उपन्यास थोमस क्रमवेल शृंखलाकै ‘वल्फ हल’ र ‘ब्रिङ अफ द बडिज्’ले बुकर पुरस्कारमा नामांकन मात्र पाएका थिएनन्, दुवैले पुरस्कार जितेर दुर्लभ कीर्तिमान कायम गरेका थिए ।

sagarmani mobile size

यी उपन्यास लेख्न भएको शोध, अनुसन्धानका कारण यति समय खायो कि उनले आफ्ना लागि समय दिन नभ्याएको गुनासो उनले त्यो बेला गरेकी थिइन् । ‘साँच्चै भन्नुपर्दा पछिल्ला तीन-चार वर्षयता म कतै पनि जान पाएकी छैन,’ उनले उपन्यासले बनाएको व्यस्तताको चर्चा गर्दै भनेकी थिइन्, ‘कतिसम्म भने म लन्डनको मुख्य शहरसमेत घुम्न पाएकी छैन ।’

उनको यो उपन्यास शृंखलामाथि बिबिसी टेलिभिजनले शृंखला बनाएकाले पनि त्यसमा बढी संलग्न रहनु परेकाले उनी ज्यादै थाकेको र यसमाथि सोच्न पनि मन नलागेको उनले बताएकी हुन् ।

सेक्सपियर थिएटरसँग संलग्न उनी अब आफू लेखनभन्दा स्टेजमा बढी सक्रिय हुन चाहेको पनि बताएकी छन् ।

‘बरू मलाई छोटो कथा लेख्न मन लागेको छ,’ उनले महोत्सवमा भनिन्, ‘अन्य काम गर्दा छोटाकथाका लागि अनेकन् प्लटहरू आउँछन् तर ती उपेक्षित भइरहेका छन् । अब जे लेख्छु, त्यसले मैलाई चकित बनाउला भन्ने अपेक्षा गरेकी छु ।’

मन्टेलको उपन्यास बुकर छोटो सूचीबाट बाहिरिएपछि उनले आफूलाई ढुक्क भएको बताएकी छन् । पुरस्कार पाए पनि नपाए पनि वितरणका दिनसम्म त्यसले एक किसिमको तनाव दिने भएकाले त्यसमा अल्झने र त्यसबाट अब निस्किसकेको उनले बताएकी छन् ।

फिक्सन पढ्नेहरू राम्रा अगुवा !
कोरोनाकालमा कसले के पढिरहेको छ भन्ने कुरा खोतल्ने क्रममा बेलायती प्रधानमन्त्रीले आफू यस बेला पुराना प्रधानमन्त्रीका जीवनीहरू पढ्न थालेको बताएका थिए ।

यसको ठीक विपरीत कोरोनाभाइरस नियन्त्रणमा प्रभावशाली भूमिका खेलेका अन्य मुलुकका अगुवाहरूले भने फिक्सन पढ्ने गरेको पाइएको छ ।

स्कटल्यान्डकी फस्ट मिनिस्टर निकोला फर्गुसन स्टर्जन फिक्सनकी ठूलो प्रशंसक हुन् । त्यस्तै न्युजिल्यान्डकी ज्यासिन्डा अर्डन, आइसल्यान्डकी कट्रिना ज्याबकडटिर तथा फिनल्यान्डकी साना मरिन पनि फिक्सनको निकै ठूलो प्रशंसक रहेको सो महोत्सवमा कुरा उठेको थियो ।

स्कटल्यान्डमा कोरोनाभाइरसको त्यति ठूलो समस्या देखिएको छैन, जति समस्या इंगल्यान्डमा देखिएको छ ।

प्रतिक्रिया
Loading...