काठमाडौँ / द ब्रिटिस कलेज (टीबीसी) स्टार्टअप फेस्ट– २०२३ सम्पन्न भएको छ। आइतबार हिमालय होटलमा भएको प्रतियोगिताको फाइनलमा उत्कृष्ट तीन टिमलाई विजयी घोषणा गरिएको हो।

टीबीसी इन्क्युबेशन सेन्टरले शुक्रबारबाट सुरु गरेको प्रतियोगितामा शीर्ष १० टिमले आ–आफ्ना विचार राखेका थिए। सबैभन्दा राम्रो विचार प्रस्तुत गर्ने ‘कम्पोस्टिङ द एक्सपान्डेड पोलिस्टिरिन (स्टाइरोफोम)’ टोलीले पहिलो स्थान हासिल गर्यो। रधिक थापाको नेतृत्वमा रहेको यो टिमले ‘रिसाइकल एण्ड स्टाइरोफोम युजिङ मिलवर्मस् एज अ प्रोसेस अफ डिकम्पोजिसन’ बारे विचार प्रस्तुत गरेको थियो। विजेता टिमले १ लाख रुपैयाँ नगद पुरस्कार प्राप्त गरेको छ। साथै, यस टिमका सदस्यहरूले टीबीसीको इन्क्युबेशन सेन्टरको एक्सेससमेत पाएका छन्।

त्यस्तै, दोस्रो स्थान हासिल गर्ने ‘टिम हार्वेस्ट ग्रो इन्भेस्टमेन्ट’ले नेपाली कृषि उद्योगका लागि लगानीकर्ताहरू भर्ना गर्नेबारे विचार प्रस्तुत गरेका थिए। उनीहरूले पुरस्कारस्वरुप ७५ हजार रुपैयाँ प्राप्त गरेका छन्।

तेस्रो स्थान ‘बायो–इन्जाइम’ टिमले हासिल गरेको छ। यस टिमले पुरस्कारस्वरुप ५० हजार रुपैयाँ प्राप्त गरेको छ। उनीहरूले वातावरणमैत्री सफाइका उत्पादनबारे विचार प्रस्तुत गरेका थिए।
टीबीसी स्टार्टअप फेस्ट देशभरका विद्यार्थीहरूका लागि आफ्नो उद्यमशील विचार प्रस्तुत गर्ने र उनीहरूको स्टार्टअपमा लगानी गर्ने उद्देश्यले सुरु भएको हो। प्रतियोगिताको पहिलो दिन नेपालभरका विभिन्न कलेजका ५० जना विद्यार्थीले आ–आफ्ना विचार प्रस्तुत गरेका थिए। तीमध्ये उत्कृष्ट १० विचारलाई अघिल्लो चरणको लागि छनोट गरिएको थियो।

उत्कृष्ट १० विचारहरूमा सहभागी भएका ५० जना विद्यार्थी मध्येबाट पाँच टिम बनाइएको थियो। त्यसपछि सो टिमका सदस्यलाई शनिबार विशेषज्ञ तथा टीबीसीका प्रोफेसरहरूले ग्रुमिङ सेसन दिएका थिए। सो सेसनको माध्यमबाट विद्यार्थीहरूले थप ज्ञान प्राप्त गरी आफ्ना विचारलाई सुधार गर्ने र अझै राम्रो प्रस्तुत गर्ने अवसर पाएका थिए।

कार्यक्रमको अन्तिम दिन विशिष्ट अतिथिहरु प्रा. टिम गोचर ओबीई र डा. पुकार मल्लले आफ्ना भनाइहरू राखेका थिए। त्यसपछि अनुभवी निर्णायकहरू स्नेह राजभण्डारी, आशुतोष दीक्षित, अमित अग्रवाल र ब्रिटिस कलेजका उप–प्राचार्य डा. प्याट्रिक म्याक्रडनसामु टिमहरूले आफ्नो उद्यमशील विचार प्रस्तुत गरेका थिए। सहभागी विद्यार्थीहरूले नवप्रवर्तन, प्रभाव र दिगो विकासका लक्ष्यहरूमा केन्द्रित रहँदै आफ्ना धारणा राखेका थिए। उत्कृष्ट विचार प्रस्तुत गर्ने तीन टोलीलाई विजेता घोषित गरिएको हो।

प्रतियोगिताको आयोजनाले विद्यार्थीहरूले आफ्ना विचार प्रस्तुत गर्ने अवसर पाएको टीबीसीको विजनेश स्कुल विभागकी प्रमुख सुनिता बस्नेतले बताइन्। ‘ब्रिटिस कलेजले नेपालको स्टार्टअप र उद्यमशिल इकोसिस्टममा योगदान पुर्याउने लक्ष्य राखको र स्टार्टअप फेस्ट र यसै उदेश्यको हिस्सा हो,’ बस्नेतले भनिन्, ‘उद्यम, प्रभाव र एसडीजी सम्बन्धि पाठ्यक्रमहरु प्रदान गर्ने शैक्षिक संस्थाको रुपमा हाम्रा लागि युवाहरुको विचारलाई वास्तविकतामा परिणत गर्न प्लेटफर्म दिनु आवश्यक छ। त्यसैले हामी यो कार्यक्रम वार्षीक रुपमा आयोजना गर्ने लक्ष्य राखेका छौ। साथै, भविष्यमा अझै धेरै शैक्षिक संस्था तथा उद्योगीहरुसँग सहकार्य गर्न चाहान्छौं।’