ममता मृदुल

यति धेरै माया नगर सम्बन्ध टुट्न सक्छ । बारम्बार राजाले भनेको सुनेकी छिन रानीले ।

छक्क पर्छु, माया गर्दा सम्बन्ध टुट्छ झन् ?, ऊ अचम्म मान्थिन् र भन्थिन् ।

एकदिन सम्बन्ध सकिएको घोषणा गर्यो राजाले ।

रानी मौन बसिन् ।

राजा अगाडि बढ्यो । सम्बन्धका खातमाथि खात थप्दै गयो । खुसी र आनन्दको खोजीमा निस्केको राजासँग सबै सम्बन्ध गास्थे ।

रानी एक्लै जीवनको रथ तान्न थालिन् ।

समय फेरि फर्कने छैन । दृष्टिकोण परिवर्तन हुने छैन । रानीले सोचिन् ।

अस्पतालको शय्यामा सुतेको राजाका औँला हातेफोनमा सल्बलायो – रानी म वीर अस्पतालको सर्जीकल वार्डको सत्र नम्बर ।

रानीले फोन काटिन् ।

गल्ती मेरै थियो । अति माया गर्ने रानीको प्रेम बुझ्न सकिनँ । – राजाको ऑखाबाट तप्प तप्प आँसु झरे ।

भित्तापट्टि फर्किए राजा, मनमा कुरा खेलाउँदै सुते ।

बिहानै ब्युझिएँ ।

एक पाटो सुतेको शरीर थाकेछ, फर्किए ।

गोडामुनि सिरान पारेर स्टुलमा मस्त रानी निदाइरहेकी थिइन् ।