सरकार परिवर्तन भयो आफूले आस र भरोसा गरेको मान्छे सरकार प्रमुख भएकोमा  म प्रसन्न भएँ ! खुसीले हौसिएँ !

अब त केही हुन्छ कि भन्ने भरोसा उसमाथि राखेँ र उपहार स्वरूप मुलुकमा व्याप्त रहेको भ्रष्टाचारलाई  बढार्ने प्रतिकका रूपमा कुचो उपहार दिएँ ।

उसले मलाई  धाप मार्दै भने, “म आफै यो कुचोले भ्रष्टाचार बढार्ने छु ! ढुक्क हुनुस् ।”

म  उपहार दिएर निस्केको मात्रै के थिए मुलुकलाई खोक्रो पारेका भ्रष्टाचारीहरुको एक हुल पसे !

तिनीहरूले सरकार प्रमुखले कुचो खोलेर छरपस्ट पार्दै गरेको देखे र साेधे,  “हजुर यो के गरेको हजुर जस्तो मान्छेले ?”

ऊ  मुसुक्क हाँसेर भन्याे, “भ्रष्टाचारीहरूलाई यै कुचोले बढार्नु भनेर यौटाले उपहार दिएको थियो । अब तपाईंहरू ढुक्क रहनुस् । नडराउनुस् । यो कुचोलाई छरपस्ट पारेँ । अब यो कुचोले भ्रष्टचारीलाई   बढार्न सक्तैन ।”

हाम्रो हजुरको जय होस् भनेर एक स्वरमा नारा लगाए !