उदयपुर। उदयपुर साहित्य कला प्रतिष्ठानको आयोजनामा शुक्रबार गाईघाटस्थित नेपाल निजामती कर्मचारी संगठनको सभाकक्षमा दुई निबन्ध–कृति सार्वजनिक गरिएका छन्। प्रतिष्ठानले आयोजना गरेको कार्यक्रममा स्रष्टाद्वय पुण्य कार्की र धनकुमार श्रेष्ठका निबन्ध–संग्रह क्रमशः ‘जराको शक्ति’ र ‘जीवन दृष्टिको’ सामूहिक रूपमा विमोचन गरिएको हो।

कार्यक्रममा निबन्धकार पुण्य कार्कीको ‘जराको शक्ति’ बारे साहित्यकार नन्दलाल आचार्यद्वारा तयार गरिएको समीक्षात्मक टिप्पणी हरिविनोद खतिवडाले वाचन गरेर प्रस्तुत गर्नुभयाे । पत्रकार कौशल चेम्जोङले कृतिको संक्षिप्त मूल्याङ्कन गर्दै पुस्तकले नेपाली निबन्ध परम्परामा सिर्जनात्मक ऊर्जा थपेको उल्लेख गर्नुभयाे ।
त्यसैगरी शारदाप्रसाद भट्टराई, डा. कैलाश कुमार राई, महेन्द्रकुमार राईलगायतका वक्ताहरूले पनि कृतिबारे आफ्ना दृष्टिकोण राख्नुभयाे ।

यसै क्रममा, स्रष्टा धनकुमार श्रेष्ठको ‘जीवन दृष्टिको’ निबन्ध–संग्रहमाथि पनि हरिविनोद खतिवडा, कौशल चेम्जोङ, पुण्य कार्की, शारदाप्रसाद भट्टराईलगायतका स्रष्टाहरूले टिप्पणी प्रस्तुत गर्नुभयाे । वक्ताहरूका अनुसार पुस्तकले जीवन, समाज र मानवीय मूल्यबोधका विविध तह–स्तरलाई सूक्ष्म रूपमा उद्घाटित गर्दछ।

उदयपुर साहित्य कला प्रतिष्ठानका अध्यक्ष डा. कैलाश कुमार राईको अध्यक्षतामा सम्पन्न कार्यक्रममा महासचिव माधव पोखरेल गोज्याङ्ग्रेले स्वागत मन्तव्य राख्नुभएकाे थियाे । कार्यक्रमको सञ्चालन प्रतिष्ठानकी सचिव सरिता पौडेल गुरागाईँले गर्नुभएकाे थियाे ।

विमोचनसँगै आयोजित साहित्यिक सत्रमा नव–पुस्ता कविहरू जोया कटुवाल, नवीन बुढाथोकी ‘श्रीकाजी’, अनिल घिमिरे, हर्कनारायण श्रेष्ठ, कीर्तिबहादुर खड्कालगायतले आफ्ना रचना वाचन गर्नुभएकाे थियाे।