साहित्यपोस्ट
नेपाली भाषा र साहित्यको सम्पूर्ण पत्रिका

द प्रोफेटको नेपाली अनुवाद (गुरू) को दोस्रो अध्यायः प्रेम

तिमी प्रेम गछौं भने तिमीले यसो नभन : 'ईश्वर मेरो हृदयमा छन्‌ ।' बरु यसो भन : “म ईश्वरको हृदयमा छु।

Chovar Blues Mobile Size

प्रेम

अलमित्राले भनी : प्रेमको विषयमा बोल्नुहोस्‌ ।

अलमुस्तफाले शिर उठाएर जब मानिसहरूतर्फ हेर्यो, त्यहाँ सर्वत्र शान्ति छायो । उसले गम्भीर स्वरमा भन्यो

प्रेमले आफूतर्फ तिमीलाई बोलाउँछ भने उसलाई पछ्याऊ यद्यपि उसका मार्गहरू कठिन र दुर्गम छन्‌ ।

उसले आफ्ना पङ्खभित्र तिमीलाई ओत्न चाहन्छ भने स्वयंलाई समर्पण गरिदेउ,

sagarmani mobile size

यद्यपि उसका पङ्खहरूबीच लुकेको तरवारले तिमीलाई घाइते पार्न सक्छ ।

ऊ तिमीसँग बोल्छ भने उसमाथि विश्वास गर ।

खलिल जिब्रान

यद्यपि उसको आवाजले तिम्रा सपनाहरू बिथोलिदेला जसरी हुरी बतासले बगैँचा तहसनहस पार्छ ।

किनभने प्रेमले जसरी तिमीलाई ताज पहित्याउँछ त्यसरी नै उसले तिमीलाई शूलीमा चढाउनेछ । ऊ जसरी तिम्रो विकासको कारक हो त्यसरी नै तिम्रो काँटछाँटको साधन हो ।

प्रेमले जसरी सूर्यका किरणहरूमा प्रकम्पित तिम्रा आकाशिएका शाखाहरूलाई सुम्समाउने छ, त्यसैपकार उसले गहिराइहरूसम्म पुगेर धर्तीमा बाँधिएका तिम्रा जराहरूलाई झक्झक्याउने छ।

उसले तिमीलाई अनाजका भरिपूर्ण झुप्पाहरूमा जस्तै स्वयभित्र समेट्नेछ ।

उसले तिमीलाई निर्वस्त्र पार्नका लागि चुट्छ ।

उसले तिमीलाई भूसरहित पार्नका लागि निफन्छ ।

उसले तिमीलाई पिसेर श्वेतवर्ण बनाउँछ ।

उसले तिमीलाई नरम बनाउनका लागि माड्छ ।

ईश्वरको पवित्र भोजनको निम्ति तिमी प्रसाद बन्न सक भनेर उसले तिमीलाई पवित्र चुल्होमा सेक्छ ।

प्रेमले तिमीसँग यी यावत्‌ कार्य किन गर्छ भने तिमीले आफ्नै हृदयका रहस्यहरू बोध गर्न सक र त्यही बोधद्वारा समष्टि जीवनको हृदयको अंश बन्न सक ।

तर यदि भयको कारण प्रेमको शान्ति र उमंगमात्र तिमी कामना गर्छौं भने, तिमी आफ्नो नग्नतालाई छोप, यही तिम्री निम्ति उत्तम हो ।

प्रेमको खलोबाट बाहिर निस्क र मौसम बिहीन संसारभित्र पस । त्यहाँ तिमी हाँस्नेछौ तर उन्मुक्त भएर हाँस्न सक्नेछैनौ, रुनेछौ तर धक फोरेर रुन सक्नेछैनौ ।

प्रेमले प्रेमबाहेक न केही लिन्छ, प्रेमले प्रेमबाहेक न केही दिन्छ।

प्रेम न कसैको मालिक बन्छ, न त कसैलाई आफ्नो मालिक बनाउँछ ।

किन भने प्रेम प्रेममा नै सम्पूर्ण हुन्छ ।

तिमी प्रेम गछौं भने तिमीले यसो नभन : ‘ईश्वर मेरो हृदयमा छन्‌ ।’ बरु यसो भन : “म ईश्वरको हृदयमा छु।

प्रेमको मार्ग निर्धारण गर्न सक्छु भनी नसोच, किनभने तिमीलाई योग्य सम्झन्छ भने प्रेमले तिम्रो मार्ग निर्धारण गर्नेछ । स्वयंलाई सम्पूर्ण बनाउनेभन्दा प्रेमको अर्को आकांक्षा हुँदैन ।

तर तिमी प्रेम गर्छौं र तिम्रो अन्तष्करणमा आकांक्षाहरू उठ्नै थाले भने तिम्रा आकांक्षाहरू यस्ता हुन देऊ :

म पग्लिन सकूँ, प्रवाहमान झरनाले जस्तै रातलाई सुमधुर गीतले अनुगुञ्जित पार्न सकूँ ।

अत्यन्त कोमलताको वेदना अनुभूति गर्न सकूँ ।

स्वयंको प्रेमानुभूतिले घायल बन्न सकूँ ।

स्वेच्छाले सानन्द आफ्नो रगत बगाउन सकूँ ।

प्रभातकालमा उन्मुक्त हृदय लिएर ब्यूँझन सकूँ र अर्को एकदिन प्रेममय जिन्दगी पाएकोमा धन्यवाद दिन सकूँ ।

मध्यान्नमा विश्राम गर्दै प्रेमको उमंगमा तल्लिन हुन सकूँ ।

साँझपख कृतज्ञ हृदय लिएर घर फर्कन सकूँ । ।राती हृदयमा प्रयतमको प्रार्थना र ओठमा प्रशंसाको गीत लिएर निदाउन सकूँ ।

मूल लेखकः खलिल जिब्रान

अनुवादकः नेत्र आचार्य

                  पुष्प आचार्य

 

प्रतिक्रिया
Loading...